اجعلي طفلك يعتمد علي نفسة

#الأعتماد_علي_النفس
واحدة من اصعب الحاجات في التربية واللي بتحتاج مجهود بجد.. هو انك تدربي اولادك على #الاعتماد_على_النفس و الاستقلال.. ابتداءاً من انهم ياكلو لوحدهم من سن سنتين ونص تلاتة.. الى انهم يصحو لوحدهم الصبح ويلبسو و يفطروا ويحضروا سندوتشاتهم في سن اكبر شويتين..
ففي الواقع انهم يعتمدوا على نفسهم يعني انك تستحملي البطء الشديييييييييد و البهدلة و الصراعات الجانبية و نوبات الصداع والمغص و الاسهال (اللي مش حقيقي طبعا) اللي بتبدأ اول ما تقولي لولادك يعملوا حاجة
فجأة..
??اصل انا دايخ اوي يا ماما الله يخليكي طبقيلي انتي لبسي.. انا جاي من المدرسة تعبان..
او ماما بطني بتوجعني و مش قادرة اكل.. و طبعا دا عشان تيجي انتي تأكليها ام خمس سنين و شوية دي
او حالات الشلل اللي هاتصيبك لما تطلبي منهم يوضبوا اوضتهم وفجأة يتحولوا الى باحثين في علم الطبيعة و الظواهر الطبيعية فتلاقيهم سايبين الاوضة و بيتأملوا النملة بتمشي ازاي.. يا سبحان الله.. و ان الوان الحيطة بتاعة غرفتهم عايزة تتغير.. الفن و سنينه بقى
او حالات فقدان النطق اللي هاتصيبك لما تطلبي منهم يسخنو اكلهم في المايكرويف و ياكلو حاجة على ما تخلصي اللي في ايدك.. ففجأة يسألوكي هو المايكرويف بيسخن ازاي، طب هو ليه مش بنحط معدن في المايكرويف، طب هو المايكرويف اصلا فين، مين اشتراه.. ويبدأوا يمارسوا حبهم للفيزياء و الكيمياء
او بنتك لما تقوليلها تغسل طبقين في الحوض و تلاقيها عمالة تتأمل المية بتنزل ازاي من الحنفية و بتغسل الاطباق بحنية كريمة مختار الله يرحمها على ولادها في العيال كبرت..
او لو بيلموا السفرة، هاتلاقي الاطباق بقدرة قادر فيها لقمة واحدة .. و قاعدة في التلاجة، او اطباق فاضية ما عرفتش تروح الحوض لوحدها فقررت تعمل حفلة في ارضية المطبخ.. اصل ما لقيناش مكان نحطهم فيه..
والحل المثالي في الحالات اللي فوق دي كلها وغيرها وغيرها كتير اوي.. انك تقومي و تعملي انتي الحاجة بنفسك.. مهو انتي صحتك بالدنيا.. و هايجرالك حاجة من كتر ما هم بيشلوكي
فالصبح انتي تقومي تصحي و تحضري فطار و تاكلي و تشربي و تحطي الاكل في اللانش بوكس.. اللي هو كيس الاكل يعني.. و تلمي الشنطة و تتأكدي من وجود المقلمة و تتأكدي ان فردتين الشراب شبه بعض و ان رباط الجزمة مربوط و ان الشعر متسرح و ان ملف الواجب في الشنطة و علبة الهندسة في الشنطة و بعدين تتاكدي انهم ركبو الباص و لما يرجعو تلمي وراهم اللبس اللي بيتساقط في الطريق للاوضة و تقعدي تنادي على الاكل و تاكليهم او تقعدي معاهم و بعدين تطلعي الواجب و تحليه معاهم و تحضري العشا و تعشي و و و و و و
و بعدين تقعي من طولك..
ليه.. لانك استسهلتي و عملتي الشغلانة عنهم يا فندم
انا عارفة انه صعب.. و احدثك الان من ارض المعركة .. انا ابتديت اعلم علي و مريم اني الصبح مش هاعمل حاجة.. هم هايصحوا ويلبسوا و يحطوا السندوتشات في الشنط و العصير و المية و هاينزلوا بدون ما انا اعمل حاجة
?فكركم دا امر سهل.. ابدا.. فكركم سهل على اعصابي.. اطلاقا.. انا اسهل لي اخلص دا كله في نص ساعة على اني اصبر ساعة ونص تقريبا و هم بيعملو الحاجات لوحدهم
ولكن انا فكرت..
لو في يوم لا قدر الله انا تعبانة و مش قادرة اقوم من السرير.. خلاص كدا الدنيا وقفت؟
لو في يوم اضطريت اسافر اي حتة في الكوكب لاي ظرف.. خلاص الدنيا وقفت؟
و ظروف تانية كتيرة..
الى جانب اني اصلا فاهمة ان اساس و هدف التربية اني اعدهم انهم يعتمدوا على نفسهم عشان الحياة الجاية قدامهم.. انا مش عايشة لهم. و مش مفروض اني افضل اعمل كل حاجة بنفسي.. اومال هم بيكبروا ليه..
وعليه ..
?‍?‍?قعدت معاهم في اجتماع جميل.. و قولتلهم من بكرة في تحدي.. و هو اني مش هاعمل اي حاجة الصبح.. و اللي يخلص يستحق نجمة
(النجمة دي تعادل عشر مكافات في نظام المكافات في البيت عندي.. يعني حاجة كبيرة اوي)
قولتلهم التحدي دا مش مسابقة مين يخلص اسرع.. يعني اللي هاينفذ هاياخد النجمة و يا سلام لو ساعدتو بعض كمان هاتبقى الحياة حلوة
التحدي يبدأ من النوم بالليل.. انتو الاتنين بتعرفوا تقروا الساعة كويس.. النوم لمريم تمانية مساءا و النوم لعلي تمانية و نص عشان بيصلي العشاء في المسجد.. انا لن اذكركم بموعد النوم
و لن اجهزكم له.. ولكن اذا مريم عايزة تسرح شعرها من بالليل و تعمله كعكة و تنام عشان تصحى الصبح حلو اوي.. و اللبس كله يجهز.. (واساسا في قاعدة عندي ان الشنطة تجهيزها عليهم و اللي ينسوا يحطوه بالليل يتحملوا عقابه في المدرسة لانه ممنوع اضافة اي شيء للشنطة المدرسية صباحا)
والاستيقاظ على صوت المنبه انا لن اوقظ احد.. واستعدادات الصباح كلها انتم..
السندوتشات معدة مسبقا او علي يعملها (لاني ابتديت اعلم علي يعمل سندوتشات وبيض و يساعد شوية في المطبخ)
والعصير و المياة انتم تحطوها (هم كانوا بيحطوها قبل كدا ولكن انا كنت اذكرهم بها)
كل هذا و الابتسامة على وجوهنا..
وبالفعل عدى اول تلات ايام.
في اول ليلة مريم استيقظت عدة مرات تسأل عن الساعة (مرة الساعة واحدة صباحا، و الثانية الساعة اربعة تقريبا) و ذلك خوفا انها ما تسمعش المنبه..
ثاني يوم علي لم يؤدِ اداءا حسنا في الصباح و لم يكن قد جهز كل اشياؤه في الليلة اللي قبلها وبالتالي لم يحصل على النجمة (طبعا زعل.. و لكن فهمته ان ليس من العدل ان يأخذ النجمة و قدرت زعله و شكرته على حرصه على النجمة و كررت انه يقدر يحاول تاني
مريم اخذت النجمة في ذلك اليوم
واليوم هو اليوم الثالث.. علي كان بطيء و لكن عادي انا مقدرة، مريم عندها برد و زورها واجعها ادتها الدوا و العسل بالماء الدافيء و لكن لم اساعد في لبس او تجهيز اي شيء
التحدي لمدة خمسة ايام.. و بعدها نضع القاعدة..
لا انكر ان اسهل بكتير اني اعمل الحاجة بنفسي.. ولكن لو عملت كدا هاطلعهم اعتماديين مش عارفين يعملوا حاجة
و هاطلع علي زوج اقصى حاجة بيعملها يرفع رجليه و مراته بتكنس الا