المقادير بقى :
4 كبيات دقيق.
كباية و ربع لبن دافى.
ربع كباية زبدة سايحة.
3 معالق كبار زيت. .
بيضة.
معلقة كبيرة خميرة.
2 معلقة كبيرة سكر.
معلقة صغيرة ملح.
حطى البيضة و الزيت على الزبدة السايحة و اضربيهم بالشوكه ببوله لوحدهم
حطيهم على الدقيق ..و اعجنى
هيبقى شكل الدقيق زى الرمل
انزلى علية باللبن الدافى. .و اعجنى.
عقبال ما العجينة تخمر هنحضر حشو العجوة طاسة على النار حطيت فيها
3 معالق كبار من العجوة .اشتريت العجوة من السوبرماركت. .. حطيت عليها 3 معالق كبار مية و سبت العجوة تسيح مع المية
و بعد كدة حطيت معلقة زبدة صغيرة و تقلبية و خلاص حشو العجوة بالطريقة دى ينفع فى أى حاجة. . كحك أو منين أو قراقيش أو قرص أو معمول هتكون تحفة و طرية و تجنن
نرجع العجينة خلاص خمرت. . ادهنى الكونتر زبدة على زيت
لفيها رول ادهنيها تانى زبدة و زيت
قسميها كور مقاس واحد و ادهنى الكور من فوق بردوا بخليط الزبدة مع الزيت علشان وشها مينشفش و يشقق.
هاتى كورة من العجين و خلى صوبعك فيها شوية زيت و افرديها.
كملى فرد بالنشابة.ادهنى تانى زبده على زيت
هنطبق العجين من الاطراف للمنتصف كالكتاب ومره اخرى نطبق العجين لعد فرده الى ان يصبح مستطيل ف حجم كف اليد
خلصت كمية العجين كلها بنفس الطريقة.
هاتى واحدة منهم و افرديها بالنشابة على شكل مستطيل .
بعد الفرد قطعتها بالسكينة بالطول علشان تعملى 2 باتية
حطى بقى حشو العجوة و ممكن تحشيها جبنة فيتا. أو أى حشو فى الدنيا ينفع. يعنى مثلا لحمة مفرومة أو فراخ أو تونة أو سبانخ بالجبنة أو مربى أو شيكولاتة اى حاجة هتنفع
لفى بقى العجين كدة رول و خلى بالك كل ما العجين يكون رقيق هيخلى الباتية يجنن
خلاصت الكمية كلها رصيها فى صينية الفرن و سبيها تخمر تانى تقريبا نص ساعة و بعد كدة حضرى طبق فية بيضة و عليها معلقة لبن و نقطتين من الخل و اضربيهم علشان ندهن بيهم وش الباتية الخل هيضيع الزفارة من البيض
ادهنى الباتية بالبيض و رشى بقى عليهم سمسم أو حبة البركة أو جبنة مبشورة مثلا
فى فرن سخن على درجة 180 دخلى الصوانى تقريبا 25 دقيقة فى الرف الفى النص و تبعية اول ما تلاقى الباتية من تحت اخد لون يبقى استوى افتحى علية الشواية من فوق علشان ياخد لون خفيف
اول ما يطلع بقى رشى علية مية ببخاخ أو بأطراف صوبعك على الباتية كلوا و غطية بفوطة نظيفة 10 دقايق بس.
Comments are closed.