طريقه عمل بريانى بالدجاج

المهم ان انا كنت باكل بريانى بالدجاج ودا كان الحمد لله زيه بالظبط … اكيد فيه طرق كتير للبريانى بس دى انا جربتها ..طعمها زي البريانى الهندى بالظبط .. كل اللى اكل منها انبهر 🙂 … اتمنى انها تعجبكم … تجربوها متخافوش … نخلى بالنا “الطبخ للجميع” … وليليتكم هندى 🙂
المكونات:
كوبين رز بسمتى مغسول ومنقوع نص ساعة – دجاج مقطع على 8 – حبهان – قرنفل – ورق لورا – قرفة خشب – جنزبيل فريش مفروم – معلقة صغيرة توم مفروم – معلقة كبيرة كركم – كارى – كمون – زعفران منقوع فى شوية مية “اختيارى” – معلقة زبده – كوب زبادى – بصل جوانح – طماطم مقطعة صغير – كسبرة مقطعة – قرن شطة
بنرفع الحلة على النار وننزل بالبهارات الناشفة تتحمص من غير زيت – بعد كدا ننزل عليها بالزيت واول ما يسخن ننزل بالفراخ لحد لون الفراخ ما يبيض
بعد كدا ننزل بالبصل والتوم والجنزبيل المفروم وبعد ما يتشوح ننزل بالبهارات المطحونة والملح
بعد الفراخ ما تاخد لون تحمير انا نزلت معاها بشوية بسلة وجزر لأنى بحبهم … وننزل عليهم بالطماطم والكسبرة
ننزل بكباية الزبادى ونقلب كل الكلام الجميل دا ونوطى النار عليه ونسيبه يتكتك مع بعضه ونروح للرز
الرز بقى عارف ان معظم الناس ممكن تستغرب الكلام لكن بجد دى اول مرة اعمل الرز كدا وكان وهمى وحبايته طولت وبقى جميل جدا … بنجيب حلة كدا نملاها مية ونسخنها وبعد كدا ننزل الرز المنقوع دا يتسلق زى المكرونة … ايوا زى المكرونة 🙂 … وبعد كدا نشوفه لو استوى بنسبة 80% ننزله فى مصفة ونصفيه من المية
نجيب حلة ننزل فيها بنص كمية الرز وبعد كدا خليط الفراخ وبعد كدا نص الرز التانى ومن غير مية
ننزل الزعفران المنقوع دا ومعلقة الزبدة نوزعها على الرز من فوق
ونقفل عليها بالفويل الحله وبعدين احط الغطا وعلى اقل نار ممكنة ونسيبه يكمل سواه .. ممكن نص ساعة مثلا … خلى بالك وانت بتفتحه عشان كمية بخار جميلة