فيما يخص عقاب المراهق بالهجر

ملحوظة سريعة لكل اب و ام.. فيما يخص عقاب المراهق بالهجر..
كتير مننا بيفتكر ان لما اقوله طب مش هاكلمك و مش عايزة اتعامل معاك (بناء على خطأ اخطأه المراهق مهما كان بقى كبير ولا صغير)
فاكرين ان المراهق هايندم ويزعل و يرجع يبوس ايد امه و ابوه عشان يكلموه
للاسف دا مش صح و مش صحيح..
يعني المراهق مش هو الطفل الصغير اللي لما تقوليله ماما زعلانة منك يزعل عشان انتي زعلانة..
المراهق دلوقت احساسه بكرامته عادي و حس العناد عنده عالي جدا.. و دي سمات المرحلة اللي من خلالها بيثبت انه كبير.. و بالتالي.. ممكن اول مرة يتأثر.. تاني مرة يتأثر ويكابر.. لكن تالت مرة يتم استخدام الاسلوب دا معاه هانلاقيه مطنش.. عشان خلاص ما بقتش فارقة معاه.. و بالعكس هو كمان هايستخدم اسلوب الانسحاب او الصمت دا معاكم لما يكون زعلان .. و لانه اصغر منكم فمش هايقولكم انا زعلان ومش هاكلمكم.. هو هايتخذ نفس الاسلوب بالصمت بس مش هايعلن عنه.. و عشان كدا بنلاقيه منسحب وقت كتير..
الى جانب حاجة مهمة اخرى و هي.. المراهق دا غالبا اخطاؤه كثيرة.. و بالتالي الاب و الام كثيري التوجيه والانتقاد.. فتأتي مرحلة الخصام او الهجر لتكون بمثابة راحة من كتر الانتقاد والزن.. بالضبط شبه الزوج اللي مراته منكدة عليه او الزوجة اللي جوزها منكد عليها.. لما حد فيهم يقول للتاني انا مش هاتكلم معاك او على الاقل يتخذ اجراء انه ما يتكلمش.. الطرف التاني بيرتاح شوية من وجع الدماغ.. هي حاجة شبه كدا جدا..
وطبعا احنا عارفين ان الاسلام لا يبيح للمسلم هجر اخاه فوق ثلاث ايام.. دا موضوع تاني بقى خالص.. و دا اخاه مش ابنه..
اذا اسلوب الهجر و مخاصمك و لسانك ما يخاطبش لساني و قلبي وربي غضبانين عليك و قلبي قلبي ربي ربي.. مش بياكل مع المراهق.. مش بيأثر فيه اوي.. او لو مأثر فيه مش هايبين لنا بسهولة (وطبعا الكلام ليس تعميم في مراهقين طبيعتهم مختلفة احنا بنتكلم على الغالبية العظمى و اللي معاها مشاكل كتير)
طب يا دعاء مهو العيال مش ملايكة و مطلعين عين ابونا لا مذاكرة ولا احساس بالمسؤولية ولا ولا ولا..
صح والله ومعاكم حق.. كتير منهم بيكون عنده لا مبالاة و فسرناها في اكثر من موضع.. بس كمان في حاجة مهمة.. اسلوبنا دا مش هايخلي عندهم مسؤولية.. و الا كان كل الناس دلوقت عندها تحمل مسؤولية و معرفة لعواقب اللي بيعملوه
طب نعمل ايييييييييييه..
حلو الكلام..
نتكلم معاه بكلمات واضحة موجزة (من طرفي كأم أو أب) و اقوله الخطأ و اللي المفروض يعمله و نتفق على عقوبة و تتنفذ بمنتهى الحسم (والحسم مش زعيق و شخط و نطر و قلة قيمة) موقف هادي ثابت بثقة في النفس..
لو تكرر الخطأ من الخطأ والعبث ان اعيد نفس الكلام ذاته تاني بقى.. وافضل اقوله فاكر من تلات شهور لما عملت نفس المشكلة وانت خلاص مافيش امل منك ..
اقوله بتفهم انا عارفة انك اكيد مش قاصد تغلط نفس الغلطة تاني لان ماحدش بيحب العقوبات.. عقابك هو كذا و انا عارفة انك هاتراجع نفسك..
الله الله ايه الكلام بتاع التلفزيونات دا يا دعاء.. يعني عايزانا بعد ما كنا بنشتم و نزعق نقول الكلام الرومانتيكي دا.. العيال مش هايأثر فيهم الكلام دا
صح ممكن ما يأثرش من أول مرة.. ولا تاني مرة.. بس صدقوني المراهق اسهل في العودة عن الخطأ من الكبير ان تركنا له الباب مفتوح.. لو ما فضلتش اقوله انه وحش وسيء و مافيش امل منه.. و لو ما فضلتش احسسه بالذنب عشان ما يفقدش الامل في نفسه ويقول يالله بقى انا وحش وحش يبقى ابقى وحش..
الكلام دا بيجيب نتيجة و عن تجربة مع حالات قابلتها و تعاملت معاها و نصحت اهلها.. الكلام دا بيجيب نتيجة مع المراهقين اللي باتكلم معاهم.. المراهقين والمراهقات عايزين يحسوا انهم كبار و حلوين و شاطرين وفاهمين.. و كبار ..
عارفة ان الكلام دا محتاج صبر و اعصاب و تحمل مننا كأهل.. بس صدقوني.. هو دا اللي بيبني ولادكم بجد..
و ايدي في ايدكم هاتقدروا والله.. بس عايزاكم تؤمنوا بأنفسكم..
و عايزاكم تضعوا نفسكم مكانهم وشوفوا تحبوا تتعاملوا ازاي..
(سيدنا محمد امرنا ان نعامل الناس كما نحب ان نعامل)[ اي: كما نحب ان الآخرين يعاملونا]
{? ⭐وده يتضمن طبعا ابناءنا وبناتنا لانهم من الناس}
انا بجد واثقة انكم قادرين على التغيير .. ومؤمنة بيكم اوي.. فلا تتخلوا عن انفسكم مهما كان التعب

Comments are closed.