لو الباذنجان مر قطعيه شرايح ولا رفيعه ولا تخينه وانقعيه ف ميه وملح ساعه هينزل المراره ف الميه
اوعى تشوى اللحمه وهى ساقعه على الفحم لان بكده هتتحرق من بره ومش هتستوى من جوه لازم قبل الشوى تكون ف درجه حراره الغرفه
بعد ما تهرسى البطاطس البوريه بملح وزبده وكمون حطى عليها رشه بيكنج بودر وحطيها على نار هاديه جدا هتبقى عامله زى الكريمه وتدوب ف الاكل
عشان تحافظى على التواليت من الصفار صبى فيه نص كوب خل وسيبيه طول الليل ونضفيه الصبح عادى
لو بين السيراميك اسود ادعكيه بفرشه اسنان محطوطه ف خل
لو عندك حشرات ف البيت وعايزه تخلصى منها استخدمى النشادر ف اركان البيت والثقوب هتخلصك منها خالص
الحد الاقصى لصلاحيه المجمدات
الفراخ واللحمه الطازه ١٢ شهر /الشوربه من شهرين ل ٣ شهور /الاسماك الطازه من ٦ ل ١٢ شهر / اللحمه المفرومه ٤ شهور /الايس كريم شهرين/الزبده من ٦ ل ٨ شهور /العيش والكيك ٣ شهور
استخدمى الشامبو لازاله الدهون من ايديكى والاوساخ من الياقات
للتخلص من ريحه الثوم او السمك من اليدين افركيهم بلبن او القهوه
متخزنيش البطاطس جنب البصل عشان بيخرج منها رطوبه وغاز بيفسد البصل بسهوله وبسرعه
عشان تحافظى على الوان الهدوم خلى وانتى بتنشرى الجزء الخارجى للداخل
استخدمى فرشه الاسنان لتنظيف مبشره الجبن او المصفايه
وانتى بتقلى السمك حطى شويه نشا وبيكنج بودر مع الدقيق بتخليه مقرمش
عشان الخيار يعيش اطول معاكى لفيه ف ورق ف التلاجه وحطيه ف كيس بلاستيك مقفول كويس
عشان ريحه المطبخ تكون جميله حطى قشر برتقال او ليمون مع ميه وعود قرفه على نار هاديه او ميه وفانيليا
لو عندك حاجه نحاس وتجيبيش ميه ناحيتها نص لمونه وادعكيها هترجع جديده
امسحى رخامه المطبخ بالخل بيقتل الجراثيم
عشان تحمى المشمع من التشقق امسحيه بمزيج من الخل والزيت
وانتى بتسلقى الخضار متكتريش الميه عشان الفيتامينات اللى ف الخضار متروحش ف الميه
متكتميش التلاجه بالحاجه رصيها ورتبيها ونظميها عشان الهوا البارد يمر للاكل كله والا هيتكون بكتيريا
حطى ف الميه اللى هتنضفى بيها الاطباق الزفره خل او عصير لمون
متاخديش مسكنات كتير بياثر على السمع خصوصا للنساء
العنب والتفاح والكريز والتوت البرى والسبانخ وسمك السالمون اطعمه تحمى خلايا المخ وبتقوى الذاكره
اللى ياكل سبانخ مره واحده ف الاسبوع على الاقل بيقل فرصه اصابته بالامراض
الشاى الاخضر فيه مضادات اكسده بتحمى من السرطان
لو ايديكى ناشفه حطى زيت زتون مخلوط بملح وبعد ١٠ دقايق اشطفيها بميه دافيه
الثوم بيساعد على الحمايه من السرطان عشان بيقوى جهاز المناعه
الثلج بيقوى البشره وبيديها نضاره وحيويه ويشد الجلد المترهل
اعشاب بتقوى الذاكره منها المرمريه والزنجبيل والعسل والقرفه والزبيب وعشبه الجينسنج
Comments are closed.