عشان اللبن ميفورش وانتى بتغليه ويقع على البوتجاز حطى على الحله معلقه خشب هتمنع فورانه
بلاش تحطى زيت ف ميه سلق المكرونه عشان بتخلى الصلصه مش تمسك فيها
لو عملتى كيكه وشها اتحرق شيلى وشها بسكينه رفيعه ورشى على الوش سكر ناعم ودخليها الفرن تحت الشوايه ٥ دقايق ودوقى الطعم
بدل ما تعملى اكل مقلى دخليه الفرن ورشى عليه زيت خفيف هيبقى صحى اكتر وسعراته اقل
لكيكه ناجحه خرجى مكونات الكيك من التلاجه قبل البدء بنص ساعه زى البيض والدقيق
عشان تشيلى الدهون من الشوربه او الاكل بسهوله حطى ٣ مكعبات ثلج هتتجمد الدهون على الوش ف الشوربه وتشيليها بسهوله
عشان تخلى الخشب بيلمع هاتى فوطه وبليها خل مركز ولمعى بيها الخشب هينور
لو لون الرخام الابيض اصفر ترجعيه ازاى زى الاول ادعكيه بعصير لمون وملح واشطفيه بميه هيرجع للونه الاصلى
عشان ريحه المطبخ تكون حلوه حطى على النار كوب ميه ف حله ومعاه فانيليا وسيبيها تغلى وشمى احلى ريحه ف البيت والمطبخ
حطى ف الشاى عود قرفه عشان تتخلصى من البكتيريا وتنعشى فمك
عشان تنضفى المشط او الفرشه انقعيهم ف محلول كربوناتو وميه سخنه وافركيها كويس هترجع زى الاول
لو عندك بقعه كاتشب على الهدوم اخلطى كميه مناسبه من الجلسرين مع ضعف الكميه ميه وسيبيها على البقعه ساعه واغسليها عادى
لو عايزه الموتزاريلا تمط متحطيهاش على البيتزا من الاول لكن سوى للبيتزا وقبل ما تخلص سوا بدقيقتين طلعيها حطى الجبنه ودخليها الفرن دقيقتين وطلعيها وبالهنا والشفا
لو عندك ورق حائط قديم عايزه تشيليه غرقيه ميه من بليل بسفنجه والصبح نضفيه بسهوله
لما تيجى تسلقى فراخ وعايزه طعمها حلو قبل ما تسلقيها ادعكيها بالحاجات دى بصله مفرومه ملح فلفل حبهان قرفه وادعكى ودخلى بين اللحم والجلد ولما تتسلق هتلاقى طعمها مختلف ومتنسيش تدهنيها زبده مع زيت وصلصه وملح وفلفل وحمريها وبالهنا والشفا
عشان الكيكه متهبطش متفتحيش الفرن قبل ٤٠ دقيقه
عشان تنضفى الفراخ من الزفاره ادعكيها بملح ودقيق وخل
حطى ف البشاميل كوب شوربه مع مقدار اللبن ولازم السمنه تكون اد الدقيق وعشان ميكلكعش ضيفى اللبن والشوربه مغليين
تبلى الفراخ واللحوم وحطيهم ف التلاجه مده لا تقل عن ساعتين عشان البهارات تتشرب كويس والطعم يكون جميل
قبل ما تشكلى الكفته اغسلى ايدك بميه ساقعه عشان اللحمه المفرومه متلزقش ف ايدك
بديل البقسماط هاتى بواقى الفينو وحمصيها وافرميها ف الكبه وحطى عليها ثوم بودر وبصل بودر وحطيه ف برطمان ف التلاجه لحد ما تحتاجيه
قبل ما تقطعى البصل حطيه ف طبق فيه ميه نص ساعه او حطى البصل ف الفريزر نص ساعه عشان عيونك متدمعش
عشان الزيت ميبهدلش المطبخ رشى على الطاسه شويه ملح
حطى شويه زيت على صوابعك لما تكونى هتفرمى فلفل حامى الزيت هيحمى جلدك من الحرقان والاحمرار من الفلفل
عايزه تحافظى على اللمون طول الوقت حطيه ف كيس ف الفريزر وخرجى منه حطيه دقيقه تحت الميه هيبقى طازه
Comments are closed.